Mine skjøre strenger er mi tredje diktsamling.
Den handlar om mellommenneskelege forhold, natur, filosofi og psykologi.
Dikta er stort sett skrivne på denne sida av årtusenskiftet.
Draumane
Draumane kjem flygande
stilt som ei ugle
for ikkje å vekkja meg
Dei slår seg ned
på hovudet mitt
Nokre av draumane mine
skulle eg gjerne ha ynskt
hadde fast substans
men dei flyg så stille av stad
Æva
Æva er noko
som ikkje finst no,
for det som
blir fødd , lever og døyr
kjem i vegen for henne.
Først når alt som
kan bli borte ikkje er meir
kjem æva inn
som det einaste sanne.
Mine skjøre strenger
Strengane mine er spende
gjennom sinnet mitt.
Dei som spelar på dei
veit ikkje kor skjøre dei er.
Ikkje spel på
dei skjøre strengane mine
med ei gong.
Snakk med meg.
Kjærteikn meg.
Då blir strengane mine
sterkare.